Menslikehulpbron-bestuur het die afgelope dekade een van die mees dinamiese studievelde in Suidelike Afrika geword. Dit is nou deel van die transformasieproses van indiensneming in die meeste organisasies. Die nuwe wetgewing, bv. die Wet op Arbeidsverhoudinge, vereis kerngesonde en regverdige verhoudinge tussen werkgewers en hul werknemers. Die doel is nie net om arbeidsvrede te skep nie, maar ook om aan werkers se behoeftes aan beter werksomstandighede, hoer vlakke van opleiding en ontwikkeling en winsdeling te voldoen. Dit is dus noodsaaklik om 'n titel wat handel oor menslikehulpbronne in die algemeen en arbeidsverhoudinge, opleiding, ontwikkeling en regstellende aksie in die besonder gereeld op datum te bring. Groenskrifte wat die basis vir toekomstige wetgewing vorm, soos die Groenskrif oor indiensnemings- en beroepsgelykheid, word ook in hierdie uitgawe aangespreek. Die vierde uitgawe van Menslikehulpbron-bestuur dek die belangrikste areas soos hierbo uiteengesit, en verskaf aan bestuurders, akademici en studente oor die hele spektrum van sake-aktiwiteite in Suid-Afrika die jongste inligting en praktiese toepassings vir die hantering van 'n organisasie se menslikehulpbronne.