Met die publikasie van Die wegraak van Frans Joosten (2004) begewe Barend hom op die gebied van die geskiedenis. Dit is die verhaal van die moord op Frans Joosten waarvoor sy vrou en twee slawe gevonnis word tot verwurging, blakering, empalering en geledebraking. Die verhaal is ook van belang vanwee die rasse- en maatskaplike implikasies daarvan deurdat Maria Joosten, 'n nooi Mouton van Hugenote-afkoms, 'n intieme verhouding met een van die slawe gehad het. Die verhaal van Joosten se verdwyning en die eindelike ontdekking van die waarheid word feitelik oorgedra en maak van die werk 'n boeiende historiese dokument.