In Wanneer ’n droom waar word moet Carmia Basson na Skamanga verhuis wanneer sy as Margo Vermeulen se assistent aangestel word. Deneys, Margo se kleinseun, wil egter nie vir Carmia daar hê nie. In Dokter Dierbaar moet Vicky Serfontein saam met dokter Paul Venter werk ná hul rampspoedige eerste ontmoeting. In Geërfde liefde moet Nikki Swart noodgedwonge op Kapisya boer. Jan, die mede- erfgenaam, maak die lewe egter vir haar onuithoudbaar.

Drie sexy, sensuele en romantiese verhale deur drie gewilde skrywers: Anderkant die volmaan deur Ettie Bierman, Bambi en die boef deur Anita du Preez en Victoriavalle van liefde deur Lizet Engelbrecht. 

In Die tuiskoms le ver word Ila Verster se soeke na geluk belemmer deurdat sy vir iemand anders aangesien word. En dan bevind sy haar in doodsgevaar tydens ’n stormagtige nag. In Rooikop te koop verander Jennie Botha se lewe eensklaps toe haar ouers in ’n motorongeluk sterf. Boonop moet sy in die liefde ’n keuse maak tussen die pynlik netjiese Thys en die deurmekaar, impulsiewe Roux. En in Ver pad na Konigsee raak pragtige Afrikaansonderwyseres Ezette Nel verlief op die aantreklike broer van Charl, haar amper-verloofde . . .

Die liefde praat met baie stemme in 'n mens se hart, het Beamari eens op 'n tyd besef, en soms moet jy diep luister om die boodskap te kan hoor. Partykeer praat die liefde met 'n fluisterstem en soms is dit soos die druising van 'n stormwind op see. Maar haar lewe is so besig dat sy nie altyd ewe goed ingestem is op fyn vibrasies en nuanses nie. Naudesrust, die piesangplaas aan die KwaZulu-Natalse Suidkus waar sy en haar rugbyman swoeg om vooruit te kom, verg meer arbeid as wat hulle kan bybring. Die diereherberg op die werf het heeltydse sorg nodig. Boonop maak die hondeskool en -salon wat sy beplan nie voorsiening vir aandagtig luister na die taal van jou hart nie. Die noodlot gryp egter in, een Saterdagmiddag in Durban op pad na 'n rugbywedstryd. En skielik, sonder waarskuwing, is daar twee nuwe stemme – een stug en befoeterd, die ander nostalgies verlief – wat haar hart laat luister. Beamari moet ’n keuse maak wat haar lewe en die van haar kind gaan verander.