Lulu is 'n sagte hond wat onder harde omstandighede grootgeword het. Na haar geboorte in 'n klein buitekamertjie word sy van eienaar tot eienaar aangegee. In die proses ontmoet sy 'n klomp vreemde kreature en beleef die een avontuur na die ander. Eindelik vind Lulu 'n goeie huis by Ingie en Jack op die klein groenteplasie Pampoenkop. Hier kry sy liefde, genoeg kos en speel van ligdag tot saans laat saam met haar nuwe boeties en sussies. Maar dan gebeur daar iets wat als kan verander... Van avontuur tot avontuur vind Lulu Lerulu die dapperheid in haarself om te wys hoe 'n groot hart in een hond klop.

Suid-Afrika 2007. Die vigskrisis het sy hoogtepunt bereik en krematoriumtorings blaas onverpoosd swart rook die hemelruim in. Die land is uitgelewer aan die diktatorskap van 'n president wat met die wysheid en insig van 'n ware tiran regeer. Teen hierdie agtergrond vlug die joernalis Braam Fourie vir sy lewe nadat hy verbind word met 'n berig waarin die huidige bestel sterk gekritiseer word. Teen 'n dolle pas ontvou 'n verhaal wat die leser op 'n skokkend eerlike en uitdagende reis neem.