Periandros van Korinthe is Opperman se debuutdrama en ook in ander opsigte baanbrekerswerk, want dit is die eerste volwaardige versdrama wat in sy geheel in Afrikaans die lig sien. Dit is in 1956 met die Hertzogprys vir drama bekroon. Die drama handel oor die lewe van die Griekse digter-staatsman Periandros (627-585 vC), die alleenheerser van Korinthe, wat sy groot droom probeer verwesenlik: om Korinthe 'n wereldstad te maak. Uiteindelik vernietig hy homself in die proses. Die skooluitgawe het 'n inleiding en verklarende aantekeninge.

Chris Barnard se bekroonde hoorspel gaan oor Lafras Verwey, 'n klerk in die staatsdiens. Sy baas roep hom gedurig in. Sy kollegas treiter hom. Almal wat hom ken, dink hy's 'n opperste sukkelaar. Maar wat hulle nie weet nie, is dat hy een van die geheime agente van die revolusie is. Soos hy aan Petra verduidelik: "Ons gaan alles afmaai. Al die grootmenere. Al die ekstra spesiale kokkedore wat die wette gemaak het; al die ringkoppe wat op ons gewone ouens trap en die wereld se geld onder hulle vet basse muf broei. Terwyl ons ouens wat die vuil werk doen in losieshuise moet bly. En met trapfietse moet kom waar ons wil wees - ons gaan die wereld weer maak soos hy was - toe elke ou nog 'n kans gehad het."