Bendes in die Kaap is weer op mevrou Smit se spoor. Sy sal self moet ingryp as sy haar doodgewone lewe wil behou.

Al wat sy wil wees, is doodgewoon. Maar dít is vir mevrou Smit nie so maklik beskore nie. Sy en Tomas is uiteindelik getroud, maar sy trek vinnig haar kop uit die huweliksknoop toe iemand uit haar verlede weer opduik om moeilikheid te maak.

’n Ou vriend van haar gewese man probeer ’n ooreenkoms tussen mevrou Smit en die polisie beding om die uitbreiding van die Kaapse onder-wêreld te stuit, in ruil vir haar veiligheid.

Dinge loop skeef, en mevrou Smit moet bontstaan om te keer dat meer bloed vloei.

As grootoog seun in die ou Oos-Transvaal het Louis Jansen van Vuuren nooit kon dink dat hy eendag die Franse kunswerke in ’n ensiklopie in sy pa se studeerkamer in lewende lywe sou sien nie, wat nog te sê dat hy ’n château in die Franse platteland sou besit.

Louis se liefde vir alles wat Frans is, is so aansteeklik dat ’n rits ander Suid-Afrikaners die afgelope paar jaar ook blyplekke in die Boussac-omgewing gekoop het. In Biltong en Dior deel hy kostelike vertellings oor hoe inkommers in ’n vreemde land met ’n haas onleerbare taal en eiesoortige gewoontes moet oorleef.

Hulle tel baie op oor Franse styl en kultuur, maar die Franse leer ook iets oor Suid-Afrikaners se onblusbare ondernemingsgees en gasvryheid. Sy stories word verryk met boeiende brokkies oor die Franse geskiedenis, taal en kultuur.

Uiteindelik gee hierdie Afrikaanse Fransman se lewe in die vreemde gee hom ook ’n nuwe waardering vir dit wat hom uniek en trots Suid-Afrikaans maak.

Smag jy na ’n outentieke belewenis van die Heilige Gees?

As daar ooit ’n tyd was dat die Heilige Gees nodig is in die kerk en in die lewe van die gelowiges, is dit sekerlik vandag. En as die Heilige Gees ooit gewillig was om hierdie behoefte en leemte te vul, is dit vandag!

In In Gees en in Waarheid ondersoek Isak Burger die Persoon en werking van die Heilige Gees van Ou-Testamentiese tye af tot nou toe. Hy kyk na aspekte soos die Persoon en simbole van die Gees, hoe Hy betrokke was by Jesus se aardse bediening en die Vroeë Kerk, vervulling en salwing met die Gees, en tekens en gevolge van vervulling met die Gees.

Ons leef in ’n tyd waarin daar wêreldwyd ’n uitstorting is van die Gees soos nog nooit tevore nie. In Gees en in Waarheid is bedoel vir elke gelowige wat smag na ’n outentieke belewenis van die derde Persoon van die Drie-eenheid.

Met haar aankoms by Noordeberg Hospitaal is Lola Anley aangenaam verras om aangewys te word as een van die topmediese studente wat blyplek in die gesogte Straumann Huis kry.

Maar haar opgewondenheid is van korte duur wanneer sy uitvind dat sy in die kamer gaan bly van ’n student wat ’n jaar gelede op die kampus vermoor is. Die raaisel rondom Asher Parker se dood is nooit opgelos nie en die moordenaar is nog op vrye voet.

Wie het vir Asher vermoor en hoekom? En waarom voel dit asof iemand Lola dophou en wag vir die regte oomblik om toe te slaan?

In die Straumann Huis begin vreemde dinge gebeur. Boonop word Lola se slaap versteur deur drome oor haar oorlede tweelingsuster. Om al die spoke ter ruste te lê móét sy die geheim van Asher se moord ontrafel – sónder dat iemand die waarheid oor haar eie verlede leer ken.

Waar bloed kruip is Marieta Carrick se debuutroman, nou heruitgegee. Die gebeure vind plaas voor dié van haar gewilde Bloed van ’n vlinder.

Met die aanvang van die Anglo-Boereoorlog besluit Robert Campbell, ’n dokter in Pretoria, en sy aptekersvriend, Thomas Park, om ’n ambulans na die gevegsfront te stuur. Campbell se dogter, Eleanor, saam met Thomas se dogter, Mary, en hul buurvrou, Martha, sluit aan as verpleegsters.

Dr. Campbell se seun, Rory, onderbreek sy mediese studies in Skotland om by die ambulanspoging aan te sluit. Op pad na Pretoria ontmoet hy drie Russe wat as vrywilligers aan die Boerekant gaan veg, insluitend Ivan van Sint Petersburg.

Soos die oorlog groei en baie gewondes in Eleanor se sorg kom, word haar geloof geskud deur die gruwels van die oorlog, die geweld en die verlies.

Wanneer Ivan in die Slag van Elandslaagte gewond word, versorg Eleanor hom. Gedurende hierdie tyd raak hulle verlief, maar hulle besef gou dat daar te veel struikelblokke tussen hulle liefde staan. Tydens die onrus van die oorlog word Eleanor mislei en sy glo dat Ivan gesterf het.

Ná die oorlog bly Eleanor ongetroud en help sy haar moeder as vroedvrou in haar praktyk. Maar, in 1919, verskyn Ivan weer ...

Uit die hart van Afrika kom ’n dringende roep, “Red die renoster!”

Met pragtige illustrasies deur Julie Smith-Belton, neem “Red die renoster” lesers op ’n reis oor die Afrikavlaktes, waar die laaste renosters steeds veg om oorlewing. Hierdie boek kombineer rym, feite en ’n passievolle boodskap van bewaring wat jong lesers sal inspireer om op te staan teen stropery en deel te word van die verandering.

Elke bladsy is ’n herinnering dat ons nog kan help. Deur die storie van hierdie majestueuse diere, ontdek kinders (en volwassenes!) hoe spanwerk, deernis en bewusmaking werklik ’n verskil kan maak.

Hoog teen die horison van die Afrika-vlaktes staan ’n boom van wonder en wysheid – die kremetartboom.

Sy takke beskerm, sy wortels voed, en sy groot, stil teenwoordigheid bring lewe aan alles rondom hom Een vir een kom die diere nader: olifante, kameelperde, uile, visarende, impalas en selfs miere. Almal vind ’n tuiste onder sy reusekroon. Hier, tussen skadu en sonlig, ontdek hulle iets dieper: die krag van saamwees, die vreugde van deel, en die vrede van behoort.

Met liriese taal en asemrowende illustrasies bring “Onder die kremetartboom” hulde aan die skoonheid van Afrika en die harmonie van die natuur.

’n Hartverwarmende verhaal oor lewe, liefde en die eenheid wat alles verbind onder die boom van lewe self.

Hierdie prettige, interaktiewe boek is vol opwindende aktiwiteite en fassinerende feite oor Afrika se voëls, van kleurryke visvangers tot majestueuse arende en pragtige flaminke.

Dit is ideaal vir kinders van 7 tot 11 jaar, en sluit woordspeletjies, doolhowe, kopkrappers, blokraaisels en baie ander aktiwiteite in wat nuuskierigheid en kreatiwiteit aanwakker.

Soos kinders speelspeel die aktiwiteite voltooi, leer hulle meer oor die geveerde vriende in hul tuin én in die wildernis.

God het elkeen van ons geskep om groot dinge te doen. Maar hoe kan ons seker wees dat ons werklik God se roeping vir ons lewe gevind het?

Geliefde skrywer en TV-persoonlikheid Joyce Meyer nooi jou uit om saam met haar te reis na vertroue, vryheid en vrede in die wete dat jy die pad loop wat Hy vir jou bestem het. Sy verken God se karakter, sy liefde – en sy doel vir jou. Hierdie boek deel ook praktiese stappe wat help om jou vertroue in God te bou. Dit wys hoe jy sy leiding kan soek en die vrees dat jy sy beste vir jou gaan misloop kan oorkom.

Ontdek God se wil vir jou lewe sal jou vul met vrede en selfvertroue sodat jy met vreugde in God se liefde kan leef.

Dis hoe mens weet dat die Here werklik leef: Jy sien sy krag wanneer Hy van mense splinternuwe skepsels maak.

Leah en Schalk leef die voorstedelike droom, hulle is gelukkig getroud, het baie vriende, 'n goeie ondersteuningsnetwerk en alles wat hul hart begeer.

Schalk is Leah se beste vriend en ’n wonderlike pa vir hul twee dogtertjies. Terwyl Schalk meer betrokke raak by die kerk en minder tyd saam met haar en die kinders deurbring, waardeer en aanvaar Barend Lubbe haar net soos sy is. Schalk verander as hy ’n
Bybelstudiegroep begin bywoon. Maar Schalk se lewe begin uitmekaar val: Sy ou vriende vermy hom; hy weet nie hoe om die kloof tussen hom en Leah te oorbrug nie en hy verloor sy inkomste. Uiteindelik ontdek Leah en Schalk om God se leiding van dag tot dag te vertrou en dat Hy hulle nie wil straf nie, maar sy liefde aan hulle wil bewys.

Juanita Aggenbach se vyfde roman is ’n roerende verhaal van tweede kanse, vergifnis en die krag van God se liefde en genade.

Ontvang genesing vir jou emosionele wonde en ontdek jou lewensdoel as God se kind in hierdie 90-daedagstukkieboek.

Genesing vir elke vrou 90 oordenkings delf diep in Joyce Meyer se eie lewensverhaal en haar reis na genesing. Ten spyte van jare se mishandeling, verwerping en verraad deur die mense die naaste aan haar, glo Joyce dat elke vrou wat diep seergekry het deur lewensomstandighede, ten volle genees kan word in hart en siel. Haar onwankelbare aanspraak het ontstaan uit haar eie reis na genesing, en ook die pad wat sy gestap het met soveel vroue wat nie wou glo dat hulle hul pyn ten volle sou oorwin nie.

Joyce neem jou op ’n 90-dae-reis om jou te bemoedig deur die lewe se struikelblokke om jou ware lewensdoel te bereik. Die Here kan jou pyn genees, en Hy wil dit in jou hart doen sodat jy die wonderlike, vreugdevolle toekoms wat God vir jou beplan het kan leef!

Die duiwel is hierdie jaar los by die klooster van die heilige sint William, Beskermheilige van die Metaversum. Dapper de Wet, roosteler, gourmand en deurwinterde loodswaaier, word teen sy sin deur die Departement afgevaardig om vas te stel wat aan die gang is.

Die klooster, geleë in wat eens die vrugbare mieliedriehoek in die Vrystaat was, bied jaarliks ’n Passiespel aan waarop hulle alle hoop vestig vir oorlewing. Maar JC van Schouwenburg, wat die hoofrol vertolk, het onverklaarbaar verdwyn en Dapper is desperaat om hom
op te spoor. Die moederowerste is ontwykend, die personeel onbehulpsaam en Broeder P, die newelagtige leier van die klooster, is ontoeganklik.

Om sy lewe verder te kompliseer moet Dapper boonop chaperone speel vir ’n beeldskone onderwyser wat met ernstige vraagstukke worstel en vir wie hy gevoelens ontwikkel het wat dreig om sy ewewig te laat kantel.

’n Verbeeldingryke, onthutsende roman wat die leser sal wegvoer na ’n ander – dog totaal geloofwaardige! – wêreld.

Fransien Theron, ’n jong kunstenaar, besluit om haarself te gaan afsonder op ’n gasteplaas in die Baviaanskloof. Dis tyd om finaal afskeid te neem van haar baba wat sy twee jaar gelede in ’n ongeluk verloor het, en te aanvaar dat Hein van haar wil skei. Sy onderneem
om die kloof se berg uit te klim en vir oulaas iets van die mooi herinneringe, wat sy en haar geliefdes in gelukkiger tye gedeel het, tydens volmaan te ervaar.

Terwyl sy stap, kruis haar pad onwetend met dié van ’n beseerde luiperdwyfie wat onlangs haar opgeskote welpie in die kake van ’n slagyster verloor het. Instinktief begin hierdie twee bewus raak van mekaar se verlies, en onder die waaksame blik van die maan gebeur
iets wat Fransien se lewe onherroeplik verander. Haar innerlike reis na heelword begin.

In hierdie magiese ruimte waar skoenlappers volgens die eksentrieke Tobie fêries op hul vlerke rondkarwei, begin Fransien weer kleur en vorm sien en leer sy opnuut hoe om voluit te lewe.

Toe Marié vier jaar oud is, verhuis haar ouers van Suid-Afrika na ’n sendingstasie in die destydse Rhodesië waar haar pa vir die plaaslike drukpers werk. In hierdie oënskynlike paradys beleef Marié die wêreld om haar met verwondering, humor, nuuskierigheid en, namate sy ouer word, met groeiende ontnugtering.

Daar is die onderliggende politieke veranderinge en spanninge van die 1970’s waarvan sy net skrams bewus is en, kort voor lank, veranderinge in die dinamiek van haar eie gesinslewe wanneer sy uitvind dat haar ma swanger is. Die koms van haar boetie onderstreep haar rol as die dogter en as “vrou-in-wording”.

Wanneer Marié en haar vriendin, Hanneke, ’n omstrede dokument beetkry en lees, begin Marié se kinderlike illusies verder kraak . . .

Einde en begin is ’n roerende bildungsroman wat strek van naïewe belewing na geleidelike ontwaking, vertel deur die oë van ’n jong karakter wat diep in die leser se hart sal kruip.

Word meegevoer na die asemrowende Afrika-landskap met hierdie pragtige kartonboek vir kinders (3 jaar en ouer) met lewensgetroue, hoëgehalte-klanke van die diere van Afrika, van die brullende leeu, laggende hiënas en trompetterende olifante. Gekombineer met die klanke is unieke en fassinerende feite, pragtige foto’s wat beide jonk en oud aantrek.

Die Klein Boekie van Safari-diergeluide is die perfekte geskenk vir enigiemand wat van die natuur hou en bied ’n wonderlike nuwe manier om wilde diere in hul habitatte te herken.

Klanke wat in hierdie klankboek verskyn, is:

• Visarend
• Bontsebra
• Seekoei
• Kaapse bobbejaan
• Gevlekte hiëna
• Kwêvoël
• Olifant
• Rooijakkals
• Witkoluil
• Jagluiperd
• Silwerbruin vleipadda
• Leeu,
• Swartrugjakkals

Stel kleintjies bekend aan die bekendste Bybelverhale! Leer hulle oor Noag se drywende dieretuin, dapper klein Dawid, en saggeaarde Jesus. Veertien geliefde verhale word oorvertel met eenvoudige, onvergeetlike rympies wat kleuters sal koester.

Dis perfek vir voorlees en as geskenk vir 'n doop, ooievaarstee en Kersfees.

In 1916 keer Caleb Kelly, ’n jong WOI-veteraan, getraumatiseerd en geskend terug na die Oos-Kaap. Die afgryse wat hy in Frankryk beleef het, is ingebrand in sy wese.

Kort ná sy terugkeer vernietig olifante die windpomp op sy plaas.

Caleb is woedend en gereed om wraak te neem. Maar dan gebeur iets onverwags en sy toorn maak plek vir ’n vriendskap met ’n trop wat bedags tussen die ruigtes naby die plaas skuil.

Intussen word grootskaalse landbou-ontwikkeling in die Sondagsriviervallei deur die regering van stapel gestuur. Dewald Troskie word aangestel om die olifante in die omgewing uit te dun.

Deur historiese feite met fiksie te verweef neem Bakkes lesers op ’n reis vanaf 1919 tot die stigting van die Addo-olifantpark in 1931. Soetdoring in die ruigtes is meer as ’n historiese roman – dit is ’n meditasie oor trauma en genesing, oor die mensdom se vermoë tot
beide vernietiging en verlossing. Die onbreekbare band tussen Caleb en sy trop olifante sal lesers ontroer, uitdaag en inspireer.

Die woord “weduwee” is ’n verdrietige woord, ’n toestand waarmee sy haarself moeilik vereenselwig. Maar hier waar Cato in die vliegtuig sit, is dit ongelukkig haar werklikheid. Haar man is dood, ’n skamele drie jaar ná hul troue. Sy is op pad terug Stellenbosch toe, waar haar ondersteuningsnetwerk is. Of dit ’n goeie plan is om terug te gaan na die plek waar sy vir Neil ontmoet het, weet sy nie, maar in dié stadium wil sy nêrens anders wees nie. Veral nie alleen in Londen nie. Êrens tussen die tyding van die motorongeluk, die blyke van waardering, die roudiens en die werklikheid van ’n leë plek langs haar in die bed, het sy haarself verloor en in haar plek ’n bang vreemdeling gevind. In Stellenbosch wag ook die gewilde Big Pink-teaterrestaurant. Hoe sy kans gesien het om dié onderneming te koop, weet sy nie, en wens dis net ’n nare droom. Dit help ook nie dat die vreemdeling langs haar op die vliegtuig vir haar sê daar bestaan nie iets soos beter dae nie…

Helga Roets is dalk aan die verkeerde kant van 80, maar jy kan haar steeds deur ’n ring trek, elke dag van die week. Sy woon nou al amper vyf jaar by Silwerhare Aftreeoord in Pretoria, en hoewel die aanpassing swaar was, voel haar blyplekkie deesdae soos huis. Sy het darem nog haar motortjie waarmee sy gereeld winkel toe ry.

Soms besoek sy vriendinne of gaan sit by ’n koffiewinkel om die mense om haar te bekyk.

Dit kom dus as ’n groot skok wanneer die oogarts makulêre degenerasie in albei haar oë diagnoseer. En vandeesweek is hoeka so ’n bedrywige week: twee begrafnisse, en Saterdag ’n troue in die Paarl.

Ten spyte van haar kinders se teenkanting, glip Helga Dinsdag suutjies uit by die aftreeoord, bagasie gepak, reg om haar reisavontuur te begin. Maar wie wag onder die lamppaal? Niemand anders nie as Stefaans de Wet, so ewe van plan om haar op haar tog te vergesel – net omdat sy nie mooi kan sién nie.

Leer die geheime van ’n suksesvolle huwelik by die topverkoper Joyce Meyer. Of jy nou dertig dae of dertig jaar getroud is, jy wil ’n huwelik hê wat in moeilike tye floreer. Maar ons huwelike lyk nie altyd soos ons gedink het dit sou nie. Miskien het jy nie probleme in jou
huwelik nie, maar jy wil jou verhouding so sterk as moontlik maak. In Die sleutels tot ’n gesonde huwelik, leer die geliefde skrywer Joyce Meyer jou om kragtige waarhede uit God se Woord vir jou en jou huwelik te ontsluit, struikelblokke na gesonde verhoudings te oorkom, in vrede met ’n onseker persoon te leef en die fokus van jouself en jou gade af te haal en eerder na die Here te kyk. Joyce Meyer se leeftyd van Bybelse wysheid en haar praktiese en persoonlike ervaring sal jou help om in jou huwelik te groei. Ongeag in watter
stadium van die huwelik jy is, jy kan hoop en moed ervaar in God se beloftes van genesing, herstel en ’n lewe vol van sy goedheid!

DIE AARDE HOU AAN MET DRAAI

As jy iemand verloor, gaan die lewe voort. Jý moet ook. Dit is wat die Van Wyk-gesin leer met een van hulle se dood.

Op ’n manier moet hulle sin maak uit wat gebeur het – en uit wat volg.

Daar is Ruan, die chirurg-pa wie se werk altyd eerste gekom het.

Markus, die matriekseun van wie almal groot verwagtinge het, wat bots met sy eie. Die drie jaar jonger Leandri wat besef sy het nooit haar ma geken nie. En Sophia wat met haar eerste skooljaar begin.

Veelbekroonde skrywer François Bloemhof het hierdie TV-reeks, wat só die land se verbeelding aangegryp het, verwerk tot ’n aangrypende roman wat wyd byval sal vind.

Die moord-en-roofspeurder Adriaan Kruger verhuis saam met sy nuwe vrou na Overberg, ’n dorpie in die Suid-Kaap. Daar ontdek hy gou onheil is nie beperk tot die grootstad nie. Die egpaar is nog besig om hul voete te vind toe hy skielik gekonfronteer word met ’n
raaiselagtige verdwyning, ’n dorpenaar wat sterf weens vergifting, en ’n ou, onopgeloste saak wat lyk asof dit met die twee onlangse sake verband hou.

Drie misdade, wat oënskynlik geen raakpunte het nie – maar los jy één op, so vermoed Adriaan, word die ander los drade ook vasgeknoop . . .

In Klipkoud kyk sy weer na die dossiere van vermiste mense. Sy heroorweeg die leidrade en luister weer na die onderhoude wat sy gevoer het. Baie van hierdie inligting is nog nooit voorheen bekendgemaak nie.

In ’n poging om ’n mate van afsluiting te bied aan die slagoffers se geliefdes, laat val Engelbrecht die soeklig op sowel ou as nuwe onopgeloste sake. Hierdie sake wissel van ’n onbekende vrou wie se oorskot onder ‘n swembad ontdek is tot ‘n jong man wat deur die gevangenisstelsel se krake geval het; van ‘n sakereis wat dodelik ontaard het tot ‘n meisie wat reg voor haar huis ontvoer is.

Engelbrecht neem die leser saam in haar deurtastende soeke na die waarheid.

“GEEN BABAS IN HIERDIE HUIS NIE!”

Zeldi wil VREESLIK graag ’n boetie of sussie hê.

Maar haar pa en ma soek nie ’n baba nie.

Dan kom los ’n mamma-draak een aand ’n eier op hulle huis se stoep.

Die eier KRIK en KROK en KRAAK.

’n Ogie loer na buite. ’n Poot verskyn. En ’n stert ...

WA-A-AT? Gaan Zeldi uiteindelik ’n GROOTSUS word?

Vir ’n BABA-DRAAK?

Dr. Emma Retief, ’n wildsveearts, moet haarself in ’n manswêreld bewys. Sy koop ’n praktyk in haar tuisdorp, maar is nie voorbereid op die aantrekkingskrag tussen haar en haar buurman, Regardt, nie.

Regardt het ’n reputasie as rokjagter, daarom bepaal hy hom nou by sy plaas en sy werk om wildstropers te stop. Hy glo hy kan dit beter as Emma doen en hulle stamp koppe. Emma begin ook twyfel aan Regardt se integriteit te midde van die wildsmokkelary.

Gaan hulle die afstand tussen hulle kan oorbrug?