Die antwoord op die vraag wat vir die gelowige belangrik is, vertel tegelykertyd watter waardes vir hom/haar uitstaan. Dit is op hierdie waardes wat die gelowige se besluite beinvloed en bepaal. Die Here se dat elkeen van ons wil he dat iemand ons liefhet. Jesus het by geleentheid verduidelik dat die twee belangrikste gebooie van almal in die Bybel is om die Here met jou hele hart lief te he en jou naaste soos jouself. In hierdie Bybelstudie vir groepe verduidelik die skrywer dat ons hoogste mikpunt in die lewe moet wees om God en ons medemens lief te he. Dit moet ons eerste prioriteit, ons sterkste ambisie, ons diepste verlange, ons voortdurende mikpunt, ons passievolle bedoeling en oorheersende waarde in die lewe wees. Hoe meer ons leer om eerlik en opreg lief te he hoe meer sal ons soos Jesus word.

Die titel in 'n hele paar jaar oor die rouproses spesiaal vir die vrou geskryf. Die skryfster praat met deernis en begrip uit eie ervaring, maar het ook wyd oor die onderwerp gelees. Sy gee aan die einde 'n bibliografie van die boeke waaruit sy aangehaal het. Hier word nie net gepraat oor die pyn en verlies as gevolg van die dood van 'n dierbare nie, maar ook oor aborsie, miskraam, verkragting en siektes wat verlies meebring. Egskeiding en verhuising word ook bespreek. Die skryfster wys ook daarop dat verlies en hartseer pluspunte het , soos geestelike groei, deernis met ander en die wete dat jy jou seeninge moet tel. Aan die einde van elke hoofstuk is daar aanhalings van bekendes wat troos bring. Die somberheid van die onderwerp word getemper deur die onwrikbare vertroue in God en die hoop op ’n toekoms sonder pyn en hartseer.

God kan nie in een enkele beeld vasgevang word nie. En ons gedagteprent van God bepaal hoe ons dink God se karakter of aard is. Die skrywer werk met 'n wye verskeidenheid Godsbeelde in die Bybel om gelowiges te help nadink oor die God wat ons daaruit leer ken … en watter impak dit op ons lewe het.

Bill Hybels, stigter en pastor van die wereldbekende Willow Creek-gemeenskapskerk in die VSA, stel 'n unieke uitdaging aan almal wat na lewensin soek: Stel vas wat presies die een verkeerde ding is wat jy nie langer kan verdra nie, en gebruik dan die passie van daardie "heilige ontevredenheid" as brandstof om jou aan te vuur om daardie saak te help regstel. Hierdie titel vol praktiese raad inspireer Christene om met God saam te werk om sy koninkryk daad-werklik te laat kom, en so persoonlike sin in die lewe te vind.

Aan die hand van die Skrif en die praktyk toon die skrywer aan hoe God dinge in ons lewe laat gebeur. Maar hoekom maak Hy dit vir ons so moeilik om sy teenwoordigheid en sy plan raak te sien? Hierdie titel handel oor hoe om die ontwerpende hand van God en sy ingryping in ons lewe so raak te sien dat ons weet dat Hy 'n besondere doel vir elkeen van ons het, en dat Hy ons daardeur sal dra totdat ons Hom van aangesig tot aangesig kan ontmoet en onsself volkome kan leer ken. Hy toon aan hoe verskillende aspekte van die lewe saamspeel om ons telkens by die antwoord te bring.

Dis asof byna almal in die een of ander stadium met dwelms eksperimenteer. Dit lyk dalk cool om 'n pil by raves te pop, of om 'n joint te rook omdat dit natuurlik is. Maar daar bestaan nie so iets soos om drugs te kan control nie. Dwelmmisbruik is 'n swaar las om te dra. Dit kan jou lewe vieslik opmors. Hierdie titel is bedoel vir ouens wat nog ietsie gebruik, en vir die wat oorweeg om in die toekoms 'n ding of twee uit te probeer. Dit is ook vir diegene wat besef hulle is hooked of meen dis cool om af en toe te drug en uit te chill … Dit gaan eintlik oor hoe om los te kom van dwelms en hoe om al jou cravings te hanteer.

Hosea is 'n vreemde kerel in die Bybel. Eintlik is dit meer sy huwelik wat so vreemd is. God verwag van hom om met 'n prostituut te trou en keer op keer na haar toe terug te gaan. So word Hosea en sy vrou en kinders beeld van God se verhouding met sy bruid – ons. Ons beur die heeltyd weg en God trek ons nader na Hom toe.

Ligdans is 'n titel oor depressie. Die skryfster, 'n vrolike tydksrifjoernalis, vertel hoe sy in 'n verskrikkende, donker maalkolk van depressie beland het. Met genade van Bo, 'n diep geloof, mediese hulp en haar geliefdes se bystand kon sy mettertyd egter weer met passie begin leef. Sy verweef haar eie rou maar ook hoogs inspirerende verhaal met die vertellings van 16 ander Suid-Afrikaanse depressie-vegters wie se ouderdomme, beroepe en geloofs- en lewensfilosofiee verskil, maar almal openlik erken (sommige vir die eerste keer) dat hulle teen depressie veg. Uiteindelik word hulle klopdans van wanhoop egter 'n hoopvolle dans in die lig – maar sonder dat hier oppervlakkige en onoortuigende oplossings opgedis word.

In Jesus se tyd het groot getalle mense van oraloor gestroom om te gaan luister na die Man wat kon genees, en wat stories vertel het oor 'n wonderlike nuwe kwaliteit van lewe wat hy "die koninkryk" genoem het. Twintig eeue later het hulle weer in hulle duisende gaan luister na 'n man wat Jesus se gelykenisse so uitgele het dat dit hoop kon gee vir verslae, siniese en ontnugterde mense in 'n bomverwoeste stad. Met hierdie titel het ook jy nou die geleentheid om na die "prente" te kyk wat Jesus geskets het van hoe mense se lewe ten diepste lyk, en van die aanvaardende liefde en nuwe lewe wat Hy aanbied.

In die boek wat ’n ‘nuwe paradigma vir kerkwees geskep het’, gee Rick Warren ’n volledige oorsig van hoe die kerk sy rol in die moderne samelewing moet vol staan.

Deur te kyk na die kerk se vyf Nuwe Testamentiese doelwitte, vang hy die essensie van die hedendaagse kerk se taak vas en wys hy watter vrug groei ten opsigte van die vyf doelwitte meebring: gemeensaamheid bring warmte; dissipelskap bring diepte; aanbidding bring krag; bediening bring invloed, en evangelisasie bring groei.

Hierdie bekroonde boek verskaf al die Bybelse beginsels, strategieë en praktiese wenke om blakend gesonde, blywend groeiende kerke tot stand te bring. Dit verskuif die fokus van gemeentebouprogramme na die opbou van lidmate sodat kerke doelgerig hul doelwitte kan verwesenlik.

En soos die titel aandui, neem die publikasie indringend en verbeeldingryk as tema die lewende in die homiletiese dinamika: die lewende stem van God, van die woord, van die gemeente en uiteindelik van die prediker. Die skrywer doen vanuit verskillende teoretiese en praktiese gesigspunte 'n kritiese ondersoek na die toestand en toekoms van die prediking, en hy pak met oortuiging omstrede kwessies soos die geldigheid van wettiese en moralistiese prediking aan. Hy ontwikkel 'n kommunikatiewe model wat hy op verrassende wyse aan die hand van kunswerke verduidelik. Vier voorbeeldpreke demonstreer sy benadering tot die saak. Die lewende stem van die evangelie is 'n gesaghebbende title vir alle studente van die teologie en 'n aansporende handleiding vir predikers.

Hierdie boek sal jou leer om spesifiek te bid vir jou vriendinne – wanneer hulle in krisisse verkeer, maar ook gewoonweg. Deur jou gebede vir hulle kan jy ’n positiewe verskil maak aan die lewens van jou vriendinne. Soms is ons so besig of is daar so baie persoonlike dinge wat ons van die Here wil vra, dat ons vergeet om vir ons vriendinne te bid. Maak dit ’n lewenswyse om jou vriendinne elke dag aan God op te dra – dié wat op die oomblik deur ’n krisis gaan, maar ook dié van hulle wat al jare deel van jou lewe is. Voordat jy begin om op hierdie manier vir jou vriendinne te bid, maak eers erns met jou eie verhouding met die Here. Want dit is net as jy self ’n innige verhouding met God het dat jy werklik sal weet hoe om vir jou vriendinne te bid.